LIVE TV
ശരീരഭാരം കുറയ്ക്കാന്‍ ശ്രമിക്കുമ്പോള്‍ പലരും ആദ്യം ചെയ്യുന്നത് ഭക്ഷണത്തിന്റെ അളവ് വെട്ടിക്കുറയ്ക്കുകയോ ചോറ് പൂര്‍ണമായി ഒഴിവാക്കുകയോ ആണ്. എന്നാല്‍ ഇഷ്ടപ്പെട്ട ഭക്ഷണങ്ങള്‍ പൂര്‍ണമായി ഉപേക്ഷിക്കാതെ തന്നെ ഭക്ഷണക്രമത്തില്‍ ചില മാറ്റങ്ങള്‍ വരുത്താന്‍ കഴിയുമോ? ഭക്ഷണം തിരഞ്ഞെടുക്കുന്ന രീതി, കഴിക്കുന്ന അളവ്, ശാരീരിക പ്രവര്‍ത്തനങ്ങള്‍ എന്നിവയ്ക്ക് ശരീരഭാരം നിയന്ത്രിക്കുന്നതില്‍ പങ്കുണ്ടാകാം. വെയ്റ്റ് ലോസ് കോച്ച് ക്രുതി ഥാക്കോര്‍ സോഷ്യല്‍മഡിയയില്‍ പങ്കുവെച്ച അഞ്ച് നിര്‍ദേശങ്ങള്‍ ഇക്കാര്യത്തെക്കുറിച്ചുള്ള അറിവ് നല്‍കുന്നവയാണ്. ഇവ എല്ലാവര്‍ക്കും ഒരുപോലെ ഫലം ഉറപ്പുനല്‍കുന്ന നിയമങ്ങളല്ല. മറിച്ച് ദൈനംദിന ജീവിതത്തില്‍ പരീക്ഷിക്കാവുന്ന ചില ശീലങ്ങളായാണ് ഇവയെ കാണേണ്ടത്.
ഭക്ഷണം കഴിക്കുമ്പോള്‍ എത്ര കലോറി ലഭിക്കുന്നുവെന്ന് കണക്കാക്കുന്നതിനു പകരം പാത്രത്തില്‍ വിഭവങ്ങള്‍ എങ്ങനെ ക്രമീകരിക്കുന്നു എന്നതില്‍ ശ്രദ്ധിക്കാം. ഇതിനായി നിര്‍ദേശിക്കുന്ന രീതിയാണ് 3:2:1 പ്ലേറ്റ് മെത്തേഡ്. ഭക്ഷണത്തിന്റെ അളവ് ക്രമീകരിക്കാന്‍ ഈ രീതി ചിലര്‍ക്കു സഹായകമായേക്കാം. എന്നാല്‍ ഈ അനുപാതം എല്ലാവര്‍ക്കും ഒരേപോലെ അനുയോജ്യമായ കൃത്യമായ അളവല്ല. കേരളീയരുടെ ഭക്ഷണക്രമത്തില്‍ ചോറ്, പച്ചക്കറികള്‍, പയര്‍വര്‍ഗങ്ങള്‍, മുട്ട, മീന്‍, തൈര് തുടങ്ങിയവ ആവശ്യാനുസരണം ഉള്‍പ്പെടുത്താം. പ്രായം, ആരോഗ്യസ്ഥിതി, ശാരീരിക അധ്വാനം എന്നിവ അനുസരിച്ച് ഭക്ഷണത്തിന്റെ അളവില്‍ മാറ്റമുണ്ടാകാം.
ചായയിലും കാപ്പിയിലും അധികമായി ചേര്‍ക്കുന്ന പഞ്ചസാര, മധുരപാനീയങ്ങള്‍, പഞ്ചസാരയുടെ അളവ് കൂടുതലുള്ള പാക്കറ്റില്‍ ലഭിക്കുന്ന പാനീയങ്ങള്‍ എന്നിവയുടെ ഉപയോഗം ശ്രദ്ധിക്കുന്നത് നന്നായിരിക്കും. ഇത്തരം പാനീയങ്ങളിലൂടെ അറിയാതെ തന്നെ കൂടുതല്‍ പഞ്ചസാര ശരീരത്തിലെത്താന്‍ സാധ്യതയുണ്ട്. ചായയിലും കാപ്പിയിലും പഞ്ചസാരയുടെ അളവ് ക്രമേണ കുറയ്ക്കുന്നതും മധുരപാനീയങ്ങള്‍ക്ക് പകരം വെള്ളം തിരഞ്ഞെടുക്കുന്നതും പരിഗണിക്കാം. പക്ഷേ പഴങ്ങള്‍ ഉള്‍പ്പെടെയുള്ള പോഷകസമൃദ്ധമായ ഭക്ഷണങ്ങള്‍ പൂര്‍ണമായി ഒഴിവാക്കണമെന്നല്ല ഇതിനര്‍ഥം.
വിശപ്പ് മാറിയാലും മുന്നിലിരിക്കുന്ന ഭക്ഷണം മുഴുവന്‍ കഴിക്കണമെന്ന തോന്നല്‍ പലര്‍ക്കുമുണ്ടാകാം. വേഗത്തില്‍ ഭക്ഷണം കഴിക്കുന്നതും ശ്രദ്ധ മറ്റെവിടെയെങ്കിലും കേന്ദ്രീകരിച്ച് പതുക്കെ കഴിക്കുന്നതും എത്രമാത്രം അളവ് കഴിച്ചുവെന്ന് തിരിച്ചറിയുന്നത് ബുദ്ധിമുട്ടാക്കാം. ഭക്ഷണം സാവധാനം കഴിക്കുകയും ഇടയ്ക്ക് വയര്‍ നിറയുന്നുണ്ടോ എന്ന് ശ്രദ്ധിക്കുകയും ചെയ്യുന്നത് അമിതമായി കഴിക്കുന്നത് ഒഴിവാക്കാന്‍ സഹായിച്ചേക്കാം. എന്നാല്‍ വിശപ്പ് അടിച്ചമര്‍ത്തുകയോ ആവശ്യത്തിന് ഭക്ഷണം കഴിക്കാതിരിക്കുകയോ ചെയ്യരുത്.
ശരീരഭാരം നിയന്ത്രിക്കാന്‍ മണിക്കൂറുകളോളം കഠിനമായ വ്യായാമം ചെയ്യണമെന്നില്ല. ഭക്ഷണശേഷം സൗകര്യപ്രദമായ രീതിയില്‍ അല്‍പനേരം നടക്കുന്നത് ദിവസേനെയുള്ള ശാരീരിക പ്രവര്‍ത്തനം വര്‍ധിപ്പിക്കാനുള്ള ഒരു മാര്‍ഗമാണ്. ദീര്‍ഘനേരം ഇരുന്ന് ജോലി ചെയ്യുന്നവര്‍ക്ക് ചെറിയ നടത്തങ്ങള്‍ പോലും ചലനം മെച്ചപ്പെടുത്താന്‍ സഹായിച്ചേക്കാം. ആരോഗ്യസ്ഥിതിയും ശാരീരികക്ഷമതയും അനുസരിച്ച് നടത്തത്തിന്റെ ദൈര്‍ഘ്യവും വേഗവും ക്രമീകരിക്കാം. നടത്തം മാത്രം കൊണ്ട് എല്ലാവര്‍ക്കും ഒരേ അളവില്‍ ശരീരഭാരം കുറയണമെന്നുമില്ല.
കുറഞ്ഞ ദിവസങ്ങള്‍ക്കുള്ളില്‍ ശരീരഭാരം കുറയ്ക്കാമെന്ന വാഗ്ദാനങ്ങള്‍ ആകര്‍ഷകമായി തോന്നിയേക്കാം. എന്നാല്‍ കര്‍ശനമായ ഭക്ഷണനിയന്ത്രണം ദീര്‍ഘകാലം തുടരാന്‍ പലര്‍ക്കും ബുദ്ധിമുട്ടുണ്ടാകാം. പകരം പതിവായി പോഷകസമൃദ്ധമായ ഭക്ഷണം കഴിക്കുക, പഞ്ചസാരയുടെ ഉപയോഗം നിയന്ത്രിക്കുക, ശാരീരിക പ്രവര്‍ത്തനം വര്‍ധിപ്പിക്കുക, മതിയായ ഉറക്കം ഉറപ്പാക്കുക തുടങ്ങിയ ശീലങ്ങള്‍ ക്രമേണ ജീവിതത്തിന്റെ ഭാഗമാക്കാം. ഭക്ഷണം പൂര്‍ണമായി ഒഴിവാക്കുന്നതോ വളരെ കുറച്ച് മാത്രം കഴിക്കുന്നതോ ശരീരത്തിന് ആവശ്യമായ പോഷകങ്ങള്‍ ലഭിക്കാതിരിക്കാന്‍ ഇടയാക്കാം.
ഒരാള്‍ക്ക് ഫലപ്രദമായ ഭക്ഷണക്രമം മറ്റൊരാള്‍ക്ക് അനുയോജ്യമാകണമെന്നില്ല. പ്രായം, ശരീരഭാരം, ആരോഗ്യസ്ഥിതി, മരുന്നുകളുടെ ഉപയോഗം, ദൈനംദിന ശാരീരിക പ്രവര്‍ത്തനങ്ങള്‍ എന്നിവയെല്ലാം ഇതില്‍ സ്വാധീനം ചെലുത്താം. പ്രമേഹം, വൃക്കരോഗം തുടങ്ങിയ ആരോഗ്യപ്രശ്‌നങ്ങളുള്ളവരും പ്രത്യേക ഭക്ഷണനിയന്ത്രണം ആവശ്യമായവരും ഡയറ്റില്‍ വലിയ മാറ്റങ്ങള്‍ വരുത്തുന്നതിന് മുമ്പ് ആരോഗ്യവിദഗ്ധന്റെ നിര്‍ദേശം തേടുന്നത് ഉചിതമാണ്.
( ഈ ലേഖനം വിവരങ്ങള്‍ നല്‍കുന്നതിന് വേണ്ടി മാത്രമുള്ളതാണ്. മെഡിക്കല്‍ ഉപദേശത്തിന് പകരമാകില്ല.ആരോഗ്യസംബന്ധമായ പ്രശ്‌നങ്ങള്‍ക്ക് ഒരു ഡോക്ടറുടെ സേവനം തേടേണ്ടത് അത്യാവശ്യമാണ്.)
Content Highlights :The 3-2-1 Plate Method for weight loss. Food choices, portion sizes, and physical activity can all play a role in managing body weight
